Organizadas por Tecedeira, ofrecen programación do 30 de maio ao 1 de xuño no Concello de Barreiros, inaugurándose o 16 de maio cun concerto do Traspielas de Su Garrido Pombo, con motivo da celebración das letras.

A asociación Tecedeira anuncia o primeiro avance do programa das III Xornadas Etnográficas da Mariña (XEAM), que se celebrarán do 30 de maio ao 1 de xuño en Barreiros, consolidando este encontro como unha cita clave para a divulgación e posta en valor da cultural tradicional galega. A liña gráfica desta edición, presentada esta mañá nun acto no Concello de Barreiros, asínaa o artista mariñao DAViXiNO.

Nesta terceira edición, Xabier Díaz e Lagharteiras figuran como pratos fortes dun programa que achegará á veciñanza e visitantes a riqueza da nosa música e baile tradicional.

Xabier Díaz participará cun encontro titulado Metendo as mans na terra, no que afondará na súa experiencia nas recollidas de campo e no proceso de recreación musical a partir do repertorio tradicional.

Unha viaxe polas mil muiñeiras que nos permite comprender como as melodías transmitidas oralmente — especialmente polas mulleres— seguen vivas e renovadas no século XXI.

Lagharteiras, grupo de referencia no eido da música tradicional galega, leva desde 2007 traballando de forma ininterrompida na recompilación, conservación e posta en valor dos cantares, instrumentos e vestimentas tradicionais. As cantareiras presentarán unha actuación baseada na forza da voz e da percusión, ofrecendo unha reinterpretación auténtica do seu propio arquivo sonoro, froito de anos de investigación.

Como antesala das xornadas, o 16 de maio, con motivo do Día das Letras Galegas, dedicado este ano ao cancioneiro popular, celebrarase na Praza do Concello de Barreiros o concerto Traspielas de Su Garrido Pombo, unha proposta audiovisual que, a partir de pezas tradicionais recollidas pola propia artista na súa aldea, combina música e imaxes para poñer en valor a memoria colectiva e a cultura popular do territorio.

As Xornadas Etnográficas da Mariña (XEAM), organizadas por Tecedeira coa colaboración nesta edición do Concello de Barreiros e da Vicepresidencia da Deputación de Lugo, a través da Área de Mocidade, ofrecerán ademais faladoiros, exposicións, mostra etnográfica, concertos e foliada con diversas agrupacións da Mariña, nun programa que será anunciado na súa totalidade nos vindeiros días.

O evento reafírmase como un espazo de encontro interxeracional, reflexión colectiva e celebración da cultura tradicional da Mariña e do conxunto de Galicia.