O goberno municipal comprobou o desenvolvemento das obras, que ascenden a 914.105,01 euros, coas que crearán unha planta de “coworking” e unha planta destinada a asociacións.

O goberno municipal de Barreiros, encabezado pola alcaldesa, Ana Ermida, e o concelleiro e deputado provincial, Dani García, achegáronse hoxe ata o Teleclub de San Cosme para comprobar de primeira man a evolución das obras de dito edificio.

Nestas primeiras semanas leváronse a cabo obras de demolición e comezouse co illamento da fachada dun edificio que acollerá espazos destinados a persoas autónomas e pequenas empresas que precisen dun local para a súa actividade, converténdose no primeiro lugar de traballo cooperativo do municipio. A alcaldesa, Ana Ermida, manifestou a “satisfacción de ver o avance das obras e a recuperación deste emblemático edificio para adaptalo ás necesidades actuais e darlle vida a San Cosme. Utilizar o patrimonio municipal para dinamizar economicamente o concello é prioritario para este goberno e o seu modelo de futuro para Barreiros.”

Ademais tamén acollerá na segunda planta, varios locais de distinta consideración para uso por parte de asociacións, “colaborando co asociacionismo de base para dotalo de espazos adecuados para os materiais e mesmo espazos para reunións.”

Ermida trasladou o agradecemento á Vicepresidencia da Deputación, representada por Dani García, que cunha aportación de máis de 500.000 euros, permite complementar o crédito obtido polo Concello a través do IGVS e levar a cabo “un dos proxectos máis ambiciosos a nivel local”.

Nas obras mantense tamén o espazo destinado a cafetería, que complementará así os servizos existentes, “recuperando ese lugar para a vida social como foi durante moitos anos referente en San Cosme. ”

“O teleclub de San Cosme é un símbolo para toda a parroquia que o construíu con aportacións veciñais e que criou varias xeracións sendo o centro social e cultural de referencia”, explica. “Por iso este proxecto é tan especial, porque se trata de recuperar un espazo do pobo para o pobo.” asegurou a rexedora.