A semana pasada asináronse os convenios cos clubs deportivos, que dan cobertura ás axudas que o Concello dispón para estas entidades.

Os presidentes do Praias de Barreiros, do CF Celta de Barreiros e do Iberia FC asistiron ao acto de sinatura coa alcaldesa, Ana Ermida; para rubricar os compromisos da entidade local e os clubs deportivos.

A achega do Concello, que ascende a 2000€ por club, ratifica o compromiso institucional na promoción deportiva local, ao tempo que ampara diversas colaboracións no desenvolvemento de outras actividades deportivas dirixidas ao fomento do deporte de base.

A alcaldesa agradeceu a disposición dos clubs para contribuír ao crecemento do deporte en Barreiros, complementando e ampliando as actividades promovidas desde o propio Concello, “creando así unha rede de bos hábitos e fomentando a vida saudable, especialmente nas idades máis temperás”.